EYABBA ESSIMU NE JAKETI ASINDIKIDDWA KU LIMANDA
OMUVUBUKA eyabba essimu, Jacketi n’engatto asindikiddwa ku limanda okutuusa nga 14/12/2021 lwa kubulwa bamweyimirira. Rick Muwanguzi 18 omutuuze wa Nateete Factory zooni y’asimbiddwa mu maaso g’omulamuzi w’eddaala erisooka Amon Mugezi mu kkooti ya Nateete Rubaga e Mengo n’asomerwa omusango gw’obubbi bw’abuliddwa abamweyimirira n’asindikibwa ku limanda lw’anadda omusango gutandike okuwulirwa. Kigambibwa nti nga 12/10/2021 ssaawa 9 ez’olweggulo mu bitundu by’akatale ka Nateete, Muwanguzi yabba essimu, Jaketi ssaako n’engatto nga byali bya Shamshi Nantambi nga bibalirirwamu emitwalo 640,000. Omuwaabi wa Gavumenti ategeezezza nti okunoonyereza kwonna kuwedde era n’asaba omulamuzi awe olunaku lw’okutandika okuwulira omusango guno. Omulamuzi Mugezi alagidde Rick Muwanguzi agende ku limanda okutuusa nga 14/12/2021 ku olwo lw’anadda mu kkoti obujulizi butandike okuleetebwa.